နယ်ခြားစောင့်တပ်အသွင်ပြောင်းလျှင် မိသားစု စားဝတ်နေရေးအားလုံး နအဖ က တာဝန်ယူမည်ဟုဆိုသော် လည်း လက်တွေ့ဖြစ်မလာသောကြောင့် လားဟူနယ်ခြားစောင့်တပ် တပ်သားများထွက်ပြေး ကြကြောင်း စုံစမ်း သိရှိရပါသည်။
“ရက်အတိအကျတော့ ကျနော်မှတ်မထားရဘူး၊ ဂျွန်လကစပြီး ကျိုင်းတုံမှာ စစ်သင်တန်း ၃ လ သွားကြတယ်။ ဒါပေမယ့် တလကျော်နဲ့ သင်တန်းရပ်လိုက်ရတယ်။ သင်တန်းဆင်းလက်မှတ်လဲမရဘူး”- ဟု အမည်မဖေါ်လို သည့် ကျိုင်းတုံသား လားဟူအမျိုးသားတဦးကပြောပါသည်။
နအဖ စစ်အုပ်စုက နယ်ခြားစောင့်တပ်ဖွဲ့များအား တပ်သားသစ် ကျပ်ငွေ ၃၅,၀၀၀၊ တပ်သား ၃၆,၀၀၀ (အခြေခံ လစာ)၊တပ်ကြပ် ၄၈,၀၀၀၊ တပ်ကြပ်ကြီး ၅၄,၀၀၀၊ ဗိုလ် ၁၃၀,၀၀၀၊ ဗိုလ်ကြီး ၁၅၀,၀၀၀၊ ဗိုလ်မှူး ၁၇၀,၀၀၀လစာ ခံစားစေရ မည့်အပြင် တမိသားစုလုံး စားနပ်ရိက္ခာ ဆန် ဆီ ဆား ပေးမည်ဟု လက်ကမ်းစာစောင် (၀ ၊ သျှမ်း၊ ဗမာ - သုံးဘာသာ) နှင့် တကွ နှုတ်ကတိပါပေးခဲ့ကြောင်း ၎င်းလားဟူအမျိုးသားက ဤကဲ့သို့ပြောပြ၏။
“ဆန်ဆီဆား အပြင် မိသားစုအရေးကူညီပေးမယ်၊ ခရီးသွားရင် ကားခပေးစရာမလိုဘူး၊ ကလေးမွေးရင်လဲ အကူအညီ အထောက်အပံ့တွေပေးမယ်။ ကျောင်းသား/သူတွေ ကျောင်းစရိတ် ဖှရီး - စသဖြင့်ပြောတယ်၊ လက်တွေ့ မှာ ဘာမှမရဘူး။ ကျနော်တို့ ဘီဂျီအက်ဖ် အတွက်မပြောနဲ့၊ သူတို့ ဗမာစစ်သားတွေတောင် ရာသီအလိုက် ခြံအလုပ်သမားသွားလုပ် ရတယ်။”
ရာသီအလိုက် ကောက်စိုက်/ရိတ်သိမ်းခြင်း၌လည်းကောင်း၊ ဘိန်းစိုက်/ဘိန်းဆီခြစ် ရာသီ၌လည်းကောင်း နအဖစစ်သား မိသားစုက နေ့စားလုပ်သားလုပ် ၀င်ငွေရှာကြရ၏။ ထို့အပြင် တပ်ရန်ပုံငွေအတွက် ထင်း၊ မီးသွေး၊ ၀ါး များခုတ်ရောင်း ပေးရ၏။
လားဟူအမျိုးသားများ ထိုကဲ့သို့ ခံစားခွင့်အပြည့်အ၀ မရသောကြောင့် ၀မ်းရေးအတွက် တပ်မှ/စစ်သင်တန်းမှ ထွက်ပြေးရခြင်းဖြစ်သည်ဟု သျှမ်းသံတော်ဆင့်သို့ ပြောပြ၏။
နယ်ခြားစောင့်တပ်ဖွဲ့များ (ပုံပါကျင်/မိုင်းတုံ အမှတ် ၁၀၀၇၊ မိုင်းယု/မိုင်းယွန်း ၁၀၀၈၊ မုံးကိုး/တာချီ လိတ် ၁၀၀၉ ၊မက်မန်း/ မော်ဖှ ၁၀၁၀) ကျိုင်းတုံ သို့ သွားရောက်စစ်သင်တန်းယူစဉ် ကာလတလျှောက်တွင်မူ ရိုက်နှက်ကြိမ်းမောင်းခြင်းတစုံတရာ မပြုသည့်အပြင် နေထိုင်စားသောက်ရေး၌ အထူးဧည့်ခံထားသည်ဟုဆို၏။
အဆိုပါစစ်သင်တန်းသို့ လားဟူအမျိုးသား ၂၅၀ ယောက်၊ သျှမ်း၊ အခါ နှင့် ‘၀’ ၁၅၀ ယောက်၊ စုစုပေါင်း အယောက် ၄၀၀ ပါဝင်သည်ဟု ဆို၏။
No comments:
Post a Comment