မျိုးချစ်သူ / ၁၇ သြဂုတ် ၂၀၀၉
ရန်ကုန်တွင် သံဃာအရေးအခင်း စတင်မည်ဟူသော သတင်းများ ယခုရက်ပိုင်းအတွင်း ပျံ့နှံ့နေပြီး လုံခြုံရေးများ ထပ်မံတိုးချဲ့ချထားကြောင်း ရန်ကုန်မြို့ခံများက ပြောသည်။
်
ပြီးခဲ့သည့် သြဂုတ်လ (၁၄) ရက်နေ့တွင် အဆိုပါသတင်း ထွက်ပေါ်လာခြင်းဖြစ်သည်ဟု ရန်ကုန်မြို့အခြေစိုက် သတင်းဂျာနယ် တခုမှ အယ်ဒီတာတဦးက ပြောသည်။
“ကြားနေတာပဲ။ အဲဒီသတင်းကတော့ ထွက်နေတာ (၃) ရက်လောက်ရှိပြီ။ ရန်ကုန်မှာတော့ သံဃာအရေးအခင်းဖြစ်မှာကို ကြောက်နေတဲ့သူတွေ ရှိသလို ဖြစ်စေချင်သူတွေလည်း ရှိကြပါတယ်။ အရေးအခင်းဖြစ်ရင် စားဝတ်နေရေး ထိခိုက်မှာကို တွေးပူနေကြသူတွေရှိတယ်။ ကုန်ဈေးနှုန်းတွေလည်း မြင့်တက်လာမယ် စသဖြင့်ပေါ့ဗျာ” ဟု အဆိုပါအယ်ဒီတာက ပြောသည်။
ကမ္ဘာအေးစေတီလမ်းပေါ်တွင် လုံခြုံရေးများစွာ ချထားသည်မှာ အဆိုပါသတင်းကြောင့်ဖြစ်ကြောင်း ကမ္ဘာအေးဘုရားရှေ့ ဂိတ်ပေါက်တွင် တာဝန်ကျရဲတပ်သားတဦးက ပြောသည်။
“ကျနော်တို့ကို အထက်က အမိန့်ချတာပါ။ တာဝန်ကျတယ်ဆိုတာနဲ့ပဲ လာပြီးစောင့်နေတာပါပဲ။ တိတိကျကျ မပြောဘူး။ ဘာလို့ လာစောင့်ရတယ်ဆိုတာကို။ ဒါပေမယ့် ပါဠိတက္ကသိုလ်က ဘုန်းကြီးတွေ အခြေအနေကို စောင့်ကြည့်ပါဆိုတဲ့ စကားတခု ကိုတော့ ပြောတယ်” ဟု အဆိုပါရဲတပ်သားက ပြောသည်။
ကမ္ဘာအေးစေတီလမ်းပေါ်တွင် ချထားသော လုံခြုံရေး ရဲတပ်သားများမှာ သေနတ်ကို အရန်သင့်အနေအထား ကိုင်ဆောင်ကာ သတိဆွဲကာ စောင့်နေကြခြင်းဖြစ်ကြောင်း မျက်မြင်တဦးက ပြောသည်။
“ပြီးခဲ့တဲ့ ၂၀၀၇ ခုနှစ်က ပုံစံမျိုးအတိုင်းပဲ၊ စောင့်နေတဲ့ပုံစံတွေက။ ဒါပေမယ့် ရဲတွေကိုလည်း အပြစ်ပြောလို့မရဘူး။ သူတို့ သိတာက သူတို့ကို ဒါလုပ်ပါလို့ပြောရင် လုပ်ရမှာကိုပဲ။ ဒါကြောင့် ရန်ကုန်က လူတွေဆိုရင် အစောင့်ချတဲ့ရဲတွေကို သနားလို့  ဆိုပြီး စားစရာတွေတောင် ၀ယ်ကျွေးတတ်ကြသေးတယ်” ဟု ကမ္ဘာအေးစေတီလမ်းမပေါ်ရှိ အင်တာနက်ကဖေးဆိုင်တဆိုင်၏ တာဝန်ခံက ပြောသည်။
သြဂုတ်လ (၁၆) ရက်နေ့ နံနက် (၁၀) နာရီခန့်က ရန်ကုန်မြို့ မြောက်ဥက္ကလာပမြို့နယ် ကျောက်ရေတွင်း မှတ်တိုင်တွင် သံဃာ အပါး (၃၀) ခန့်က သပိတ်ကိုယ်စီကိုင်ဆောင်ကာ ရပ်နေကြကြောင်း ရန်ကုန်မြို့ခံတဦးက ပြောသည်။
“ခါတိုင်းရက်တွေက ဘုန်းကြီးတွေများတော့ များတယ်။ ဒီနေ့လိုတော့ မများဘူး။ လိုင်းကားတွေရပ်တဲ့မှတ်တိုင်မှာ ရပ်နေတာက ဆွမ်းခံဖို့သွားမှာမို့ ကားစောင့်တာလည်း ဖြစ်နိုင်တယ်လို့ ပြောလို့ရတယ်။ ဒါပေမယ့် အခုပုံစံက အဲဒီလိုကို မဟုတ်တာ။ ပြီးတော့ ကျောက်ရေတွင်း ခုံးကျော်တံတားနဲ့ ခုံးကျော်တံတား အနီးပတ်လည်မှာလည်း သံဃာတွေကို တွေ့နေရတယ်။ အရင်နေ့တွေနဲ့ မတူတာတော့ အမှန်ပဲ” ဟု ကျောက်ရေတွင်း ခုံးကျော်တံတားအနီးတွင် တာဝန်ကျနေသော ယာဉ်စည်းကမ်း ထိန်းသိမ်းရေး အရာထမ်းတဦးက ပြောပြသည်။
ရန်ကုန်တိုင်းအတွင်း ကျောင်းတိုက်များရှိ သံဃာတော်များကို အစိုးရဆန့်ကျင်မှုလုပ်ငန်းများတွင် ပါဝင်ပါက သံဃာများကို လူဝတ်လဲစေပြီး ထောင်ဒဏ် (၃) နှစ်ချမှတ်မည်ဟု မြို့နယ်အာဏာပိုင်များကတဆင့် အကြောင်းကြားထားကြောင်း မယ်လမု ဘုရားအနီး ကျောင်းတိုက်တခု၏ ဆရာတော်တပါးက မိန့်ကြားသည်။
တာမွေမြို့နယ် နတ်ချောင်းရပ်ကွက်အတွင်းရှိ ကျောင်းတိုက်များတွင်လည်း သံဃာတော်များကို အာဏာပိုင်များက အပြင်မထွက်ကြရန် တားမြစ်ထားကြောင်း မင်္ဂလာအေးကျောင်းတိုက်၏ ကျောင်းတိုက်တာဝန်ခံ ဘုန်းတော်ကြီးတပါးက မိန့်သည်။
မြန်မာနိုင်ငံတွင် ပြီးခဲ့သည့် ၂၀၀၇ ခုနှစ် စက်တင်ဘာလအတွင်းက ရွှေဝါရောင်တော်လှန်ရေးဖြစ်ပွားခဲ့ပြီး နောက်ပိုင်းတွင် အစိုးရက ဘုန်းတော်ကြီးကျောင်းများကို ယခုနှစ်တိုင် အထူးစောင့်ကြည့်ခြင်းများ ပြုလုပ်လျက်ရှိကြောင်း ဗဟန်းမြို့နယ်အတွင်း ရှိ ဘုန်းတော်ကြီးကျောင်းတကျောင်းက ပြောသည်။
အဆိုပါကာလအတွင်း ပခုက္ကူမြို့၌ သံဃာတော်များ ငြိမ်းချမ်းစွာ မေတ္တာပို့လမ်းလျှောက်သည်ကို နအဖစစ်အစိုးရက ကြိုးတုပ်ဖမ်းဆီး ရိုက်နှက်ခဲ့သဖြင့် သံဃာတော်အားလုံးက သပိတ်မှောက်ကံဆောင်ခဲ့ကြသည်မှာ ယနေ့ထိတိုင် ကံသပိတ်မလှန်ရသေးပေ။ မြန်မာနိုင်ငံတွင် သံဃာတော်ဦးရေမှာ (၄) သိန်းကျော်ရှိသည်ဟု သိရသည်။
မြန်မာနိုင်ငံလုံးဆိုင်ရာ သံဃာ့တပ်ပေါင်းစုအဖွဲ့ကြီးက မတရားဖမ်းဆီးထားသော သံဃာတော်များအား လွှတ်ပေးရန်နှင့် သံဃာတော်များအပေါ် နှိပ်စက် သတ်ဖြတ်စော်ကားမှုများကို စစ်အစိုးရအာဏာပိုင်များက ပြန်လည်တောင်းပန်ရန်နှင့် မလိုက်နာပါက တတိယအကြိမ် ပတ္တနိက္ကုဇ္ဇနကံဆောင် သပိတ်မှောက်မည်ဟု ထုတ်ပြန်ထားသည့် ကြေညာချက်တစောင် အင်တာနက်များမှတဆင့် ပြန့်လွှင့်နေသည်။
အဆိုပါကြေညာချက်တွင် လာမည့် သီတင်းကျွတ်လဆန်း (၁၄) ရက်၊ (၂-၁၀- ၂၀၀၉)၊ နေ့လယ် (၁၂) နာရီနောက်ဆုံးထား၍ ဖမ်းဆီးထားသောသံဃာတော်များအား ပြန်လွှတ်ပေးရန်နှင့် သာသနာတော်အပေါ် စော်ကားထားမှုများကို စစ်အစိုးရအနေဖြင့် ၀န်ချတောင်းပန်ရန် တောင်းဆိုထားသည်။
တောင်းဆိုချက် (၂) ရပ်ကို မလိုက်နာပါက လာမည့် သီတင်းကျွတ်လပြည့် (၁၅) ရက်၊ (၃-၁၀-၂၀၀၉) တွင် မြန်မာတနိုင်ငံလုံးရှိ သံဃာတော်များနှင့် ပြည်ပနိုင်ငံအသီးသီးရှိ သံဃာတော်များ ပူးပေါင်းကာ နအဖစစ်အစိုးရနှင့် အပေါင်းပါများအား ပတ္တနိက္ကုဇ္ဇနကံဆောင် သပိတ်မှောက်မည်ဖြစ်ကြောင်း မြန်မာနိုင်ငံလုံးဆိုင်ရာ ရဟန်းပျိုသမဂ္ဂနှင့် သံဃသာမဂ္ဂီအဖွဲ့ဟူ၍ ဖော်ပြထားသည်။
No comments:
Post a Comment